Astrofyzikarjo wuwiwaja w Zhorjelcu wědomostne plany za najwjetši teleskop swěta

Wot 16. do 20. junija 2025 diskutuja 550 wobdźělnikow na mjezynarodnej wědomostnej konferency w europskim měsće Zhorjelc / Zgorzelec přichod najwjetšeho radijoweho teleskopa swěta.

Square Kilometre Array Observatory (SKAO) twari so tuchwilu w Južnej Africe a Awstralskej. Němska je na mjezynarodnym projekće, wobstejacy z dwanaće krajow, wobdźělena. Astrocentrum Łužica (DZA) a Max-Planck-Institut za radijowu astronomiju pod pěrujetej SKAO.

Minister za wědomosć Gemkow a Astrocentrum Łužica (DZA) zahaja konferencu

"DZA sadźi jako wuski SKAO partner jasnje widźomne znamjo za Łužicu a Saksku – a to po cyłym swěće. Z DZA smy jedyn dźěl najwjetšeho radijoweho teleskopa, kotryž technologiske a digitalne wužadanja ze sobu přinjese. Te chcemy tu rozrisać ", praji sakski minister za wědomosć Sebastian Gemkow.

Nimo wuznamnych wosobinow kaž Philipa Diamonda CBE, generalneho direktora SKA-wobserwatorija, a Michaela Kramera, direktora Max-Planckoweho-Instituta za radijowu astronomiju MPIfR w Bonnje, wočakuja so slědźerjo z Awstralskeje, Chiny, Indiskeje, Italskeje, Nižozemskeje, Južneje Afriki, Zjednoćeneho kralestwa, Čěskeje a Němskeje w Zhorjelcu – wjele z nich su wodźace hłowy astrofyziki. Hłowne schadźowanišćo w měsće budźe Gerhart-Hauptmann- dźiwadło w Zhorjelcu.

Astrofyzikarjo z cyłeho swěta w Zhorjelcu

"To je najwažniše zarjadowanje za radijowe astronomy po cyłym swěće. Tu we wutrobje Europy rozsudźi so přichod najwjetšeho zwjazka teleskopow, kotryž su ludźo hdy twarili", wuzběhujetaj Günther Hasinger, designirowany załoženski direktor DZA, a Stefan Wagner, profesor astrofyziki při uniwersiće Heidelberg, sobuiniciator DZA a sobuorganizator konferency.''

Do přichoda sahace zarjadowanje nosy titul "Nowa doba astrofyziki: Přihot na prěnju fazu wědomostneho wužiwanja SKAO".

Wjerški schadźowanskeho tydźenja

• Zahajenje konferency ze sakskim ministrom za wědomosć Sebastianom Gemkowom póndźelu,
  16. junija, wot 09:30 hodź.
• Zjawny přednošk z Michaelom Kramerom (direktor MPIfR) "Potajny uniwersum: eksplozije,
  Čorne dźěry a daloke planety" wutoru wječor (17. junija) w 19:30 hodź.
• Srjedu dopołdnja twarja šulerki a šulerjo w DZA swójske radijowe teleskopy, kotrež srjedu
  popołdnju na njebjo wusměrjeja a daty Mlóčneje dróhi zapisuja.

Astrocentrum Łužica (DZA) dawa impuls

Astrocentrum Łužica (DZA) hraje klučowu rólu při strukturnej změnje Łužicy. Wón pozicioněruje region jako mjezynarodny hotspot wurjadneho slědźenja, twori dźěłowe městna a budźe ze technologiskim slědźenjom a datowu wědu inowacije spěchować a mjezynarodne zhromadne dźěło doprědka ćěrić.

Konferenca organizuje so wot SKAO, Astrocentruma Łužica (DZA) a Vereinigung für datenintensive Radioastronomie (VdR) a je po dołhim času najwjetše astrofyzikaliske schadźowanje
w Němskej.

Medijowy kontakt: 

Astrocentrum Łužica (DZA)
nawoda komunikacije Stephan Witschas
e-mail: medien-dza@dzastro.de